曼联喺周日(28日)英超煞科战，凭查顿辛祖同般奴费南迪斯入波，主场2比1击败富咸，以英超第3名成绩冲线，今场胜仗系曼联今季第27场主场胜仗，追平球会史上单季主场最多赢波纪录，第1季执教嘅坦哈格赛後总结：「恭喜球员踢咗一个杰出嘅球季！」

曼联今场只系争第3位，但19分钟就被富咸率先入波，7分钟後卡斯米路再输12码，不过迪基亚神勇扑出阿历山大米杜域嘅主罚，令曼联得以大反扑，由查顿辛祖同般奴费南迪斯入波反胜2比1完场。完场後曼联全队齐齐庆祝迪基亚夺英超金手套奖，总算系笑住咁收咧。

首季执教嘅坦哈格赛後向奥脱福球迷致辞：「首先我要多谢所有球员，佢哋踢咗一个杰出嘅球季。多谢职员同所有球迷嘅支持同贡献，虽然我话多谢，但其实我哋仲有1场比赛，我肯定球员会倾尽全力去打败曼城，我亦相信我哋好有机会将英足盃冠军带番奥脱福！」