曼联左闸劳基梳尔上仗英超对车路士，不幸受伤，一度传出佢可能缺阵6月3日晚英足盃决赛对曼城。不过，呢位27岁英格兰国脚嘅伤势已无大碍，可以跟随大队操练，甚至有望出战周日(28日)晚英超煞科战对富咸。

曼联领队坦哈格表示，劳基梳尔嘅情况唔错，至於可唔可以上阵对富咸，仍然要睇下佢能否通过最後体测。劳基梳尔今季表现出色，无论踢左闸或者中坚，演出都非常可靠，如果佢可以上阵，无疑能够提升红魔鬼胜算。

由於曼联已经稳夺英超前4位，可以参加下届欧联，预料坦哈格今仗可能出副选，留力踢英足盃决赛对曼城。