英超煞科日决出最後一张欧洲赛入场券，阿士东维拉、热刺同宾福特3支竞逐球队齐齐赢波，最终维拉以1分力压热刺排第7位，相隔13年後再次进军欧洲赛，季中接任嘅西班牙领队艾美利，亦用成绩证明佢喺英超一样可以得到成功。

艾美利喺上年10月代替谢拉特执教嗰阵，维拉排喺第17位担心降班，但呢位前阿仙奴领队上任令球队脱胎换骨，周日(28日)煞科战主场2比1击败白礼顿後，成功保住联赛第7位嘅欧协联资格，自2010年踢欧霸盃附加赛後，再次尝到欧洲赛滋味。

2019年被阿仙奴炒鱿後，艾美利曾被质疑教唔掂英超，佢赛後表示：「欧洲赛系维拉嘅最新目标，我哋会享受去唔同国家比赛，我唔会理会之前批评我嘅声音，我教波已经20年，有比较成功同冇咁成功嘅球队，但由始至终目标都系得一个，胜利。」至於失望嘅热刺，就系自2010年後首次无缘欧洲赛事，球队依家仲未请到新领队，王牌前锋哈利卡尼亦盛传将会离队。