周日(28日)凌晨沙特阿拉伯联赛，有C朗助阵嘅艾纳斯作客仅逼和伊蒂法克1比1，被榜首伊蒂哈德拉开至5分距离，由於只剩下1轮联赛，艾纳斯笃定成为亚军，意味C朗连续2季冇盃捧。赛後网民疯狂耻笑C朗系失败者，艾纳斯出2亿欧元(约16.8亿港元)年薪畀佢，等於倒钱落海。

艾纳斯上半尾段失守，虽然换边之後由路尔斯古斯达禾入波扳平，但始终未能反超前，C朗更於84分钟被换走，注定冇得再扮演救世主。反观，伊蒂哈德大胜艾菲哈3比0，提早夺得冠军。

艾纳斯失冠之後C朗职业生涯第4次遭遇单季冇盃捧嘅尴尬局面，另外3次分别系2004/05年、2009/10年及上季，亦系佢连续2季四大皆空。

由於宿敌美斯同日协助巴黎圣日耳门(PSG)夺得法甲冠军，网民趁机抽水耻笑C朗，有人话：「C朗完全系失败者，佢加盟艾纳斯之後，球队连榜首都冇埋。」其他人附和：「佢之前令祖云达斯、曼联变得更差，依家艾纳斯亦不能幸免。」

另有评论指美斯喺法甲入波帮助PSG夺冠，但C朗却连沙特联赛都踢唔掂，边个系史上最佳球员，已经一目了然，亦有人直接了当指艾纳斯以2亿欧元年薪签入C朗，根本就浪费金钱。