曼联周二(30日)举行22/23球季年度颁奖礼，今季55场比赛攻入30球嘅前锋拉舒福特，众望所归成为大赢家，佢连擸曼联足球先生同球员先生两大奖项，亦系自1998年嘅杰斯之後，首个曼联青训产品赢得晒曼联足球先生奖。

曼联全体职球员都盛装出席今次颁奖礼，不过大赢家只得拉舒福特，佢获奖後表示：「我觉得好光荣，已经好长时间冇曼联青训赢呢个奖，所以我份外光荣，希望之後会有更多年轻球员都可以分享我呢个感觉。我要多谢队友、职员，冇佢哋我唔会有呢个成绩。」

拉舒福特目前仍然同曼联斟介续约，「红魔鬼」早前启动佢合约内自动续约1年条款，依家合约到2024年完结，坦哈格话有信心可以同呢位英格兰国脚续约。另外，巴西翼锋安东尼马菲奥斯喺欧霸盃对巴塞隆拿嘅入波，被选为曼联今季最佳入球。

近10季曼联足球先生

2023●拉舒福特

2022●迪基亚

2021●劳基梳尔

2020●安东尼马迪尔

2019●劳基梳尔

2018●迪基亚

2017●路尔斯华伦西亚

2016●基斯史宁摩

2015●迪基亚

2014●迪基亚