英超煞科後，各路雄师开始进入组军模式，将会出战英足盃决赛嘅曼联，领队坦哈格日前接受《泰晤士报》专访讲组军大计，佢坦诚表示门将迪基亚同中坚哈利马古尼位置尴尬，去留成疑。不过最爆嘅系，坦哈格首次公开谈及年初被撤销强奸等指控嘅格连活特，赞佢过往已证明自己能力，暗示球队或有佢嘅位置。

21岁嘅格连活特去年1月被指虐打女友，被警方控告涉嫌强奸、伤人同控制他人等罪，不过今年2月获撤销指控，曼联随即发声明话会内部调查，暂时继续停赛停操，当时坦哈格只系话：「我冇嘢讲，球会声明已经讲晒。」不过呢位荷兰教头喺周二(30日)《泰晤士报》专访，就罕有咁作出强烈暗示。

被问到前锋增兵问题，坦哈格表示：「我哋喺拉舒福特之外，需要另一个人去分担入球责重，格连活特以往已经证明自己有做曼联前锋嘅能力，不过关於佢重返球队嘅决定，并唔系由我话事。」格连活特17岁开始为曼联上阵，停赛前为「红魔鬼」踢过129场入35球，仲入选埋英格兰国家队，实力不庸置疑。

关於两大老臣迪基亚同哈利马古尼嘅前途，坦哈格直指迪基亚就算续约，都唔一定会系正选：「我相信佢会留低，但我唔保证佢系正选，每个位置都一定要有2个球员竞争正选位置。」坦哈格更直指哈利马古尼要为去留做决定：「我满意佢嘅表现，但佢依家嘅情况冇人会觉得开心，(去留)唔止系我嘅决定，亦系佢嘅决定。」