71岁意大利名帅云尼亚里，周一(12日)凌晨再次创造奇迹，佢带领嘅卡利亚里喺意乙升班附加赛决赛，喺补时阶段绝杀巴里成功升班。「云爷爷」喺33年前曾经带领卡利亚里由意丙杀上意甲，之後又喺英超创造过李斯特城夺冠童话，今次再度带领卡利亚里升班，「云爷爷」完场後激动到哭成泪人。

呢场升班附加赛决赛，首回合两队踢成1比1，卡利亚里今仗作客巴里虽然占上风，但一直搵唔到入球。89分钟云尼亚里换入前锋柏禾列迪，结果呢位後备奇兵喺94分钟交出绝杀，助卡利亚里赢1比0，两回合合计赢2比1，下季得以重返意甲角逐。

云尼亚里喺上年12月季中接手卡利亚里，当时球队只排第14位，但佢上任後执教25场只输过2场，最终更成功升班。云尼亚里喺1988年首次执教卡利亚里，带领球队连续2年升班，由意丙升上意甲，估唔到33年後再一次帮球队升班意甲，难怪「云爷爷」咁激动。