曼城历史性赢得欧联冠军，领队哥迪奥拿再次成为奇迹制造者，呢位西班牙名帅继08/09球季带领巴塞隆拿横扫欧联、西甲同西盃冠军後，今季亦率曼城赢晒欧联、英超同英足盃冠军，成为史上首位2次打造「3冠王朝」嘅领队。

自费格逊喺1999年带领曼联做3冠王後，哥迪奥拿成为英格兰史上再次实现3冠里程碑嘅教头，亦系哥迪奥拿历来第3个欧联冠军，同施丹、派士利并列史上第2位，仅次於4夺冠军嘅安察洛堤，最难得嘅系哥迪奥拿3次捧盃，有2次都系做「3冠王」，难度极高。

哥迪奥拿喺2009年同2011年为巴塞隆拿2度赢欧联，相隔12年後，哥帅首次喺冇美斯在阵下捧欧联欧冠，52岁嘅哥迪奥拿赛後表示：「赢欧联真系好难，我嘅球员非常出色，半场嗰阵我话需要运气，比赛胜负就好似掷银仔一样，但上天早有安排，冠军系属於我哋！」

经历2年前欧联决赛失意，哥迪奥拿表示球队将尽情狂欢：「我哋会喺酒店入面同家人、朋友一齐庆祝，星期一会返曼彻斯特举行胜利巡游！欧联冠军好难、做3冠王真系好难！」