曼城历史性实现「3冠王」大业，领队哥迪奥拿居功至伟，呢位西班牙教头深明全队上下一心先系成功关键，所以佢决定将自己约75万镑嘅英超冠军奖金，拎出嚟分畀曼城全体职员，连接待员、保安员等基层都一样有份！

英国《每日邮报》报道，喺曼城受到所有职员爱戴嘅哥迪奥拿，日前决定将佢嘅冠军奖金拎出嚟分畀职员，虽然未知实际金额，但曼城顶级球员合约内嘅冠军奖金为75万镑(约743万港元)，预计哥迪奥拿嘅奖金亦系差唔多。哥迪奥拿认为冠军系全队功劳，每个职员都有份贡献，所以呢笔奖金系会分晒畀包括接待员、保安员在内所有人。

哥迪奥拿目前同曼城合约去到2025年，据报班主文梳亚非常希望尽早同佢续约，不过哥迪奥拿表明暂时唔会作出决定。