意甲冠军拿玻里正式宣布，聘请鲁迪加西亚担任教练，接替早前离队嘅主帅史巴列堤。鲁迪加西亚今年4月被沙特阿拉伯豪门艾纳斯炒鱿，盛传系由於球星C朗不满呢位59岁法国名帅战术部署，逼佢执包袱。不过，鲁迪加西亚依家搵到好工，下季可以领军踢欧联，难怪网民认为佢应该「感谢」C朗助攻。

鲁迪加西亚曾经教过圣伊天、里尔、马赛、里昂等球队，上年6月去沙特阿拉伯「掘金」，担任艾纳斯主帅，原本成绩出色，有望问鼎联赛冠军。不过，自从C朗年初加盟艾纳斯之後，成绩走下坡，结果喺4月被炒。

鲁迪加西亚教波生涯最威水系2010/11年球季，协助里尔成为法甲及法足盃双料冠军，亦曾率领马赛打入2018年欧霸盃决赛，但不敌马体会。另外，鲁迪加西亚对於意甲并唔陌生，因为佢曾於2013至16执教罗马。

网民认为鲁迪加西亚被C朗「逼走」，其实系因祸得福，因为可以重返欧洲4大联赛搵食，兼有得领军踢欧联，反观一直最渴望参加欧联嘅C朗，只能够留喺沙特，睇人哋踢欧联。