葡萄牙上轮欧国外大胜波斯尼亚，般奴费南迪斯交出2入波同1助攻，表现光芒四射。呢位曼联球星由上季至今，已经踢咗超过6,700分钟比赛，系欧洲上阵时间最长球员，不过葡萄牙领队马天尼斯就指般奴费南迪斯享受比赛，大赞佢喺队中嘅重要性。

根据《FIFPro》早前统计，般奴费南迪斯由上年7月1日开始，计晒所有热身赛、联赛、盃赛同国际赛事，合共上阵接近6,700分钟，系欧洲5大联赛入面最高球员，平均休息时间只有4.3日，上仗对波斯尼亚亦踢足90分钟，健康情况令人担心。

葡萄牙领队马天尼斯就话：「睇到般费嘅上阵时间，我系咪应该担心？但事实上球员非常希望落场比赛，般费就系热爱比赛嘅代表人物，佢哋唔锺意操练，但落到场比赛总系带住笑容。般费系足球场上最聪明嘅球员，佢会令到身边队友变得更好！」