车路士2021年欧联决赛击败曼城捧盃，球会史上嘅最高峰喺2年後面目全非，除咗班主由阿布拉莫域换成保利之外，冠军阵容系2年间亦几乎全部换晒，23/24球季好可能只系剩番3个功臣在阵！

2年前欧联决赛，门将由艾度亚文迪把关，呢位塞内加尔门将已同意转去沙特联赛；防线方面鲁迪格上年已改投皇家马德里，而队长阿斯派古达正同拜仁斟介，有望同旧帅杜曹喺德甲再续前缘，如无意外，只有堤亚高施华、列斯占士同芝维尔3人会继续留守车路士。

车路士最大变动系中前场，欧联决赛嘅阵容全部换晒，佐真奴今年1月已过档阿仙奴，尼高路简迪约满後亦转战沙特，决赛一箭定江山嘅夏维斯据报已倾掂转投阿仙奴，另一德国国脚迪姆华拿亦喺上年重返RB莱比锡；最後系美臣蒙特，佢拒绝同车路士续约後已被挂牌，目前正同曼联斟介转会。

更加夸张嘅系，当年12个後备球员，韦利卡巴尼路、马高斯阿朗素、安达斯基斯坦臣、葛特苏马、艾马臣柏美尼、比利基莫亚同基奥特7人早已离队，高华锡、薛耶治、基斯甸普列锡同赫臣奥度尔离队已成定局，下季好大机会只剩阿列沙巴拿加一人留队。