美职球队国际迈亚密正式宣布签入自由身嘅前巴塞隆拿队长布斯基斯，据悉双方签约2年，意味呢位34岁西班牙中场将会同前巴塞队友美斯再次合作。一般估计两人可能会喺香港时间7月22日早上举行嘅「美墨联赛盃」，首次为国际迈亚密上阵对墨西哥球队蓝十字。

布斯基斯喺今季西甲结束後，约满离开效力咗16年嘅母会巴塞隆拿，早前已传出佢拒绝沙特阿拉伯球会开出丰厚合约，选择加盟国际迈亚密，依家终於落实。国际迈亚密喺球会官方社交网Twitter播放短片，展示哥迪奥拿、沙维、安历基、美斯，甚至皇马中场莫迪历以往对布斯基斯嘅赞美评价，作为第一步欢迎仪式。

除咗布斯基斯之外，另一位早前离开巴塞隆拿嘅老将佐迪艾巴亦好可能加盟国际迈亚密，组成「美斯朋友队」。