正出战欧国盃嘅葡萄牙U21，阵中唔少球星都喺英超搵食，其中喺阿仙奴「被遗忘」嘅纽奴泰华利斯，被上季借用嘅马赛退货後，新球季前景成疑，今届U21欧国盃就系佢证明自己实力嘅最佳舞台。

阿仙奴2年前喺宾菲加收购左闸纽奴泰华利斯，第1季都有28次上阵纪录，不过上季自辛真高加盟後，佢就被外借去马赛。纽奴泰华利斯喺法甲亦展示出「进攻左闸」嘅威力，以後防身份喺法甲入6球，前教练杜陀曾赞佢「有能力踢巴塞隆拿」。不过纽奴泰华利斯之後表现下滑，更一度因训练态度问题被雪藏，借用期满後亦被「退货」。

纽奴泰华利斯目前唔喺阿仙奴计划之中，据报土耳其劲旅加拉塔沙雷已向佢提出斟介，不过纽奴泰华利斯希望借U21欧国盃踢出身价，吸引更多球会嘅聘约，佢目前头2场分组赛都正选踢足90分钟，喺左路助攻系葡萄牙U21嘅一大武器，亦系葡萄牙U21争出线关键之一。