海地喺美洲金盃B组首轮，顺利赢卡塔尔2比1，嚟紧将会挑战中北美洲霸主之一嘅墨西哥，到时就要睇实「海地球王」杜根斯拿逊嘅表现。

杜根斯拿逊现年29岁，系海地足球史上最佳射手，上阵52场入28球，上仗对卡塔尔亦有士哥，2018年对荷属圣马丁岛一仗创下个人攻入5球纪录，列入史册。

讲番杜根斯拿逊经历，佢走遍欧亚各地，喺法国球队罗连安特青训出身，早年混迹法国低组别联赛，又去过印度发展，2017年加盟狼队，先後外借到高云地利同奥咸，近年去过比利时、苏格兰等，去年效力保加利亚嘅索菲亚中央陆军至今。

2015年美洲金盃，海地亦系靠佢入波，协助球队小组出线杀入淘汰赛。今届海地首轮旗开得胜，今仗火并墨西哥，海地食粥食饭就睇杜根斯拿逊踢成点。