2021年卷入涉嫌性侵儿童丑闻嘅基菲尔施古臣，「隐居」2年後即将重返球坛！据英国《太阳报》报道，33岁嘅基菲尔施古臣已答应登陆美职，加盟由前队友朗尼带领嘅华盛顿联队，预计今个星期内可完成转会。

爱华顿2年前证实有球员因涉嫌性侵儿童被调查，虽然英国媒体被禁公开球员身份，不过冰岛媒体就确定疑犯系基菲尔施古臣，呢位冰岛国脚自此之後亦冇再出现，去年夏天约满正式离队。英国警方今年4月宣布，有关案件已经结束，佢哋唔会对基菲尔施古臣采取任何行动，意味呢位中场可以重返球坛。

目前喺美职争夺东岸季後赛资格嘅华盛顿联队，据报将会同基菲尔施古臣签约，基菲尔施古臣周一(26日)已飞抵华盛顿体测。华盛顿联队主帅朗尼，2017年曾经喺爱华顿同基菲尔施古臣做队友，佢相信以基菲尔施古臣嘅能力，可以帮华盛顿联队提升战力。