2年前一度「翻生」兼入选英格兰国家队嘅连格，今夏被诺定咸森林宣布放弃後，依家仍然未有班落。30岁嘅连格日前接受《天空体育》访问，表示会考虑任何球队嘅斟介，但就暗示沙特阿拉伯系佢嘅目标落脚地。

连格表示：「我会考虑任何聘约，最重要系间球会适合我、有充足上阵时间，讲到底我都只系希望踢波。」近期疯狂引入欧洲球星嘅沙特阿拉伯，连格就暗示系理想地方：「沙特依家有个大计划，未来1年或者几年，沙特会系足球坛嘅热点，咁多球星选择去沙特踢波唔令人意外，我都会考虑沙特嘅聘约。」

连格嘅前曼联队友C朗拿度同恩哈路，依家都喺沙特阿拉伯搵食，亦有传闻由朗尼执教嘅美职球会华盛顿联顿，亦有兴趣搵连格加盟。