上季喺意甲包尾降班嘅森多利亚，将重建任务交畀名将派路，呢间老牌球会周三(28日)宣布，正式委任派路为球队新教练，双方签约2年，目标系喺明年重返意甲竞逐。

44岁嘅派路球员时代被誉为天才中场，不过执教能力就麻麻，虽然首季执教祖云达斯拎到意盃冠军，但喺联赛成绩差劲，执教1季就被炒鱿，上年转战土耳其执教新贵卡拉古拉克，最终排土超第7位，成绩一般，今次佢决定重返意大利球坛，希望可以喺森多利亚重振雄风。

森多利亚降班後大地震，除咗同派路签约2年之外，另一前祖云达斯球员历高达利亦会出任球队竞赛部主管，球探部门亦有新人上场，希望下季可以立即争取升班重回意甲。