美国队喺美洲金盃尽现霸气，周一(3日)朝早喺A组最後一轮，主场6比0大炒千里达，喺小组2胜1和凭较佳得失球压倒牙买加首名出线。美国前锋捷西斯费拉拿，连续2场上演帽子戏法，成为美国队史上首个连续2场「戴帽」球员。

美国上轮6比0炒圣基茨和尼维斯，今仗对住千里达一样唔留手，效力华盛顿联队嘅前锋捷西斯费拉拿继上仗连中三元，今场又包办晒美国上半场3比0所有入球，成为美国史上第1人；美国下半场再入多3球，最终大胜6比0。

美国临时教练卡拉汉赛後大赞捷西斯费拉拿：「我见佢喺禁区内嘅走位充满信心，成场比赛都好似为佢而慢落嚟，捷西斯费拉拿除咗带领锋线，亦会主动防守，返中场协助组织，佢踢出非常精彩嘅一届赛事。」A组另一仗牙买加5比0赢圣基茨和尼维斯，得失球差唔及美国排次名出线。