周一(3日)凌晨U21欧国盃8强赛事，英格兰U21以1比0击败葡萄牙U21杀入4强，将会同以色列U21争夺决赛资格，不过「小三狮」今仗亦付出沉重代价，中场积及蓝斯下半场勇战伤出，赛後被影到要拎拐杖离开球场，准决赛多数唔能够候命。

英格兰U21喺分组赛3战全胜兼未失1球，今仗面对葡萄牙U21早段即刻抢攻，34分钟一次美妙组织，今届串演前锋嘅安东尼哥顿接应基比斯韦特传中，禁区内轻松射入。英格兰U21领先後明显缩後，被葡萄牙U21控制形势，67分钟更有积及蓝斯受伤，不过英格兰U21仍能坚守城池，保住1比0胜局。

效力阿士东维拉嘅积及蓝斯赛後被影见拎拐杖，领队卡斯利赛後表示：「我哋会再帮佢检查，但肯定唔会冒任何风险，就算打止痛针可以喺下场上阵，我哋都唔会咁做，佢嘅足踝依家肿晒，但佢会得到最好嘅治疗。」另一场8强赛事，乌克兰U21以3比1淘汰法国U21，4强将会面对西班牙U21。