上季德甲亚军多蒙特正式宣布，签入死敌拜仁慕尼黑嘅中场沙比萨，双方签约4年，转会费为1,900万欧元(约1.64亿港元)。呢位29岁奥地利国脚今年1月被拜仁外借去曼联，但红魔鬼拒绝买断佢，依家总算有着落。

沙比萨2年前由RB莱比锡加盟拜仁慕尼黑，但不受重用，总共上阵54次入2球，曼联今年1月向拜仁借用沙比萨，暂代受伤嘅基斯甸艾历臣，佢为红魔鬼18次披甲入3球，表现只属一般，结果被「退货」。

拜仁亦无意留用沙比萨，令佢惨成「人球」被2支球队踢来踢去，幸好依家获得多蒙特收留，获得20号球衣，相信「蜜蜂兵团」希望用沙比萨顶替转投皇马嘅祖迪比宁咸。

沙比萨签约之後，扬言要协助多蒙特捧盃，多蒙特上季最後一轮联赛和波失分，被拜仁慕尼黑追至同分，因为净得球不及拜仁，将冠军拱手让人，沙比萨来季当然希望踢争气波，帮「蜜蜂兵团」报仇。