阿仙奴将於周四(27日)早上继续喺美国出战季前热身赛，恶斗巴塞隆拿，而根据《每日邮报》报道，阵中小将巴洛根正进行单独训练，相信今场都未必会有份上阵，下季随时面临再被外借，甚至卖走嘅风险。

正远赴美国出战季前热身赛嘅阿仙奴，早前啱啱不敌另一支英超球队曼联，29人大军近日复操。不过根据《每日邮报》报道，上场喺後备席坐足全场嘅前锋巴洛根，同阵中伤兵辛真高只系喺旁边进行单独训练，预计呢名22岁美国国脚，下场斗巴塞都好大机会冇份踢。

「枪手」前锋位置竞争激烈，仲有加比尔捷西斯同尼基迪亚在阵，所以巴洛根上季已经被外借到法甲兰斯，当中39次上阵攻入22球，表现备受好评；有传多支球队都希望借用佢，而国际米兰更加开价3,500万镑(约3.5亿港元)收购，不过同「枪手」要求嘅5,000万镑(约5亿港元)仲有段距离，预计季前热身赛上阵机会唔多嘅巴洛根，下季未必有得留低。