国际迈亚密周日(20日)捧完北美联赛盃之後，又要匆忙喺周四(24日)早上出战美联盃4强作客FC辛辛那提，国际迈亚密教练马天奴表明，唔会轮换阵容，意味36岁球王美斯将继续正选上阵，并有望刷新3项纪录。

美斯已经踢咗7场北美联赛盃，合共射入10球，协助球队夺得冠军，全世界都以为主帅马天奴会畀呢位老将休息一下，但呢位阿根廷名帅话：「只要美斯冇要求休息，佢都会继续上阵，佢想参加每1场比赛，一直同队友并肩作战。」

美斯由7月22日北美联赛盃首次为国际迈亚密披甲对蓝十字开始，已连续7场上阵，如果继续参加美联盃4强对FC辛辛那提，意味佢将於33日内踢8场比赛，对呢位老将嘅体力系一大考验。

不过，以美斯嘅级数空降美国球坛，根本大超班，踢得好轻松，如果佢今场能够射破FC辛辛那提大门，职业生涯就可以累积攻入107支唔同球会大门，另外可以将连续入波场数增至8场，创下效力新球队最佳开局纪录，同埋美斯球员生涯已累积入817球，属於史上最多入球嘅南美洲球员，今场有望再刷新纪录。