阿仙奴今夏豪花超过2亿镑(约20亿港元)增兵，包括以6,500万镑(约6.5亿港元)向车路士收购中场夏维斯，但呢位24岁德国国脚延续效力车仔时期嘅颓势，入「厂」後表现令人失望，周二(22日)凌晨英超对水晶宫，佢踢足全场只有1次射门，并且唔中目标，领队阿迪达想靠夏维斯提升中场进攻力嘅如意算盘，恐怕打唔响。

阿迪达非常器重夏维斯，早前社区盾对曼城，安排佢踢前锋，但却浪费唔少入波良机，否则唔需要搞到互射12码。首场英超对诺定咸森林，夏维斯仍然冇建树，今仗作客水晶宫，演出都系乏善可陈，全场只39次触球，2次尝试扭过对手都失败，15次同对手对抗，只有8次成功，并6次失去控球权，得1射并唔中目标，甚至被指传球能力不及已离队嘅防守中场格列沙加。

夏维斯效力车路士3季，表现经常受批评，阿迪达仍然坚持高价签入佢，睇怕今次「豪赌」应该输咗。