周二(22日)凌晨英超「伦敦打吡」，阿仙奴喺最後10人应战下，作客1比0险胜水晶宫，开咧2连胜同曼城、白礼顿一齐喺榜首带出。阿仙奴今场赢得辛苦，夏天以1.05亿镑(约10.5亿港元)加盟嘅迪格兰赖斯满场飞，热图显示佢喺场内每个角落无处不在，成为阿仙奴踢少个下保住胜果嘅最大功臣。

阿仙奴今场控制战局，上半场尼基迪亚先有窄角度射门中柱，再接应迪格兰赖斯妙传龙门口笠高，半场踢成0比0平手；换边後阿仙奴加强压力，尼基迪亚53分钟禁区内博到12码，由马田奥迪加特操刀射入。正当阿仙奴以为掌控形势，富安健洋喺67分钟争议性拎第2面黄牌被逐，令形势急转直下。

踢少个嘅阿仙奴尾段退守，将士用命下成功抵御水晶宫嘅轰炸，其中迪格兰赖斯有3次争波成功、4次重夺球权，有90%传球成功率之余，热图(Heatmap)所见佢喺4分之3个球场都呈现深红色状态，满场飞踢法参与度极高，赛後亦获选为今场赛事最佳球员。

阿仙奴领队阿迪达赛後表示：「迪格兰赖斯踢得好好，佢主宰成个中场同比赛，对进攻同防守影响力好大。」至於迪格兰赖斯就话：「我只系每日保持专注、聆听，同队友建立关系同默契，2场联赛拎6分系个好开始，我哋要继续努力进步。」