法国足总周一(21日)宣布，传奇前锋亨利正式成为法国U21领队，双方签约至2025年，目标系带领法国喺明年巴黎奥运会赢得男足金牌。

亨利系法国史上第2射手，不过佢执教生涯成绩麻麻，之前教摩纳哥同蒙特利尔冲击都未有成绩，上年底世盃後辞去比利时助教一职後，一直处於自由身状态，今次答应执教法国U21，将会系佢重振教练生涯嘅好机会，尤其明年夏天巴黎奥运会，法国U21被视为冠军热门之一。

46岁嘅亨利今次上任，同时获前昂热领队巴迪高担任助教，法国年青一代人材济济，适龄球员包括威廉沙列巴、卡马云加等球星，而基利安麦巴比、宾施马等都曾经表示有兴趣喺「主场」出战奥运，亨利拎住一手靓牌势争取佳绩。法国U21会喺9月同丹麦U21踢热身赛，亦会系亨利首度领军。