车路士今个夏天已放走19个球员，不过一队仍然超过30人，领队普捷天奴希望喺转会窗完结前继续清货，其中3个「卖剩蔗」卢卡古、赫臣奥度尔同马兰沙亚，据报已被贬落U21操练，车仔更打算将卢卡古以割价甚至外借方式踢走。

据伦敦《标准晚报》报道，车路士自普捷天奴上任後，仍未同卢卡古有过任何对话，呢位比利时前锋亦决心再战意甲，但车路士同祖云达斯嘅谈判仍有好大分歧。原本车路士希望沙特球会出手，不过之前一直斟介嘅希拉尔，早前已经签入富咸前锋阿历山大米祖域，令卢卡古出路更少。

为尽快踢走卢卡古，车路士愿意大幅下降原本3,500万镑(约3.5亿港元)嘅定价，甚至会考虑外借方案，消息指热刺已密切注视。至於赫臣奥度尔同马兰沙亚，因为都坐拥超过10万镑周薪(约100万港元)合约，令唔少球会却步。