周六(9日)凌晨欧国盃外围赛A组，西班牙作客以7比1狂胜格鲁吉亚，年仅16岁前锋耶马入波，一举成为「斗牛兵团」史上最轻上阵及最年轻入波球员，同时亦系近117年欧洲国家队最年轻入波球员，呢位被誉为「新美斯」嘅天才小将，随时会系下一位球王。

两队实力相距悬殊，西班牙凭艾华路莫拉达梅开二度，丹尼尔奥莫建功，加上对方中坚索罗门卡域维利亚摆乌龙，上半场40分钟已经领先4比0，亦系西班牙自2019年11月对罗马尼亚之後，近4年首次上半场入到4球。

由於大局已定，西班牙主帅富安迪临完上半场作出2次换人，包括用首次入选嘅巴塞隆拿新星耶马入替丹尼尔奥莫，造就佢以16岁零57日成为西班牙国家队史上最轻上阵球员，比巴塞队友加维2021年创下嘅17岁零62日旧纪录，年轻超过1岁。

换边之後，格鲁吉亚虽然追番1球，但西班牙一发力又将纪录拉开，艾华路莫拉达再次建功，首次喺国家队完成帽子戏法。後备上阵嘅尼高拉斯威廉斯都射入1球，佢之後助攻耶马射成7比1创造历史。

耶马唔止成为西班牙史上最轻上阵及最年轻入波球员，亦系欧洲国家队近117年最年轻入波球员，仅次於1882年北爱尔兰嘅约翰史东(15岁零160日)及1906年匈牙利名将贺维夫(16岁零12日)，同时超越已退役威尔斯球星加里夫巴利，成为欧国盃外围赛史上最年入波球员。

出身於巴塞隆拿青训系统嘅耶马，今年4月首次为巴塞一队上阵，表现一鸣惊人，今季迅速成为主力，近3场西甲都担任正选，甚有当年美斯出道时嘅影子，被睇好有潜力成为未来球王。

西班牙赢波之後，3战取得2胜1负排小组第2位，落後5战全胜嘅苏格兰9分。