喀麦隆顺利出线非国盃决赛周，门将奥拿拿明年1月将缺席曼联最多9场比赛，其实仲有新签入嘅摩洛哥中场苏夫恩岩拉伯特，同埋英格兰右闸云比沙卡，云比沙卡祖国刚果民主共和国主帅近日公开召唤，如果成事，出年1月曼联将会冇咗3个主力，相当大镬。

非国盃决赛周将於出年1月13日至2月11日在科特迪瓦举行，呢段时间曼联赛程最多会有9场波，包括4场英超、2场英足盃、2场英联盃同1场欧联16强。

奥拿拿已同喀麦隆主帅尼高拔桑治和解，重返国家队，如无意外将会出战非国盃，苏夫恩岩拉伯特喺转会死线前加盟曼联，佢系摩洛哥喺卡塔尔世盃打入4强主要功臣，系国家队铁胆，喀麦隆同摩洛哥都系争标份子，势必缺席曼联多场赛事。

云比沙卡系英格兰右闸，但一直以来都未被徵召，佢仲有机会代表祖籍嘅刚果民主共和国，该国主帅Sebastien Desabre表示，欢迎云比沙卡加入国家队出战非国盃，云比沙卡已经25岁，英格兰唔要佢，代表刚果民主共和国都系一条出路。