利物浦周六(16日)英超早场作客狼队，领队高普嘅噩梦成真，乌拉圭前锋达云纽尼斯喺日前世盃外负伤而回，据报系肌肉受伤，今个星期联赛上阵成疑。

乌拉圭喺周三(13日)世盃外作客输畀厄瓜多尔，达云纽尼斯喺半场因伤退下火线，领队比尔沙赛後证实：「达云纽尼斯肌肉出现问题，佢已经跟唔到逼抢嘅节奏，换走佢系简单决定。」达云纽尼斯喺之前对智利一仗正选上阵踢73分钟，协助乌拉圭赢3比1。

利物浦领队高普喺国际赛期间，曾表示担心南美球员会有问题：「依家嘅球员要飞去世界各地比赛，情况好恐怖，我哋星期六对狼队前48小时，南美洲嘅球员仲喺世界嘅另一端比赛，我哋要做好准备去应付呢场硬仗。」