阿根廷周三(13日)喺世盃外南美洲区，作客3比0大胜玻利维亚，呢场比赛「球王」美斯并冇上阵，据阿根廷传媒报道，原来美斯喺呢场波被注册为阿根廷助教，唔通「球王」将会成为阿根廷教练兼球员？

阿根廷媒体《TNT Sport》报道，美斯喺作客玻利维亚高原主场前，已经同领队史卡朗尼沟通好唔会上阵，不过美斯并冇打算「拍箩柚」走人，而系继续留队支持队友。由於国际足协规定，未进入大军名单嘅球员系唔可以出现喺後备席，美斯又唔想霸占一个後备名额，所以佢就注册成为阿根廷国家队助教，全场着住教练团制服，名正言顺喺後备席睇波。

报道指美斯喺首场世盃外对厄瓜多尔曾受轻伤，所以对玻利维亚唔冒险上阵，完成国际赛後，美斯会即刻返美国向国际迈亚密报到，周日(17日)作客阿特兰大联嘅美职赛事有望上阵。