曼联前队长哈利马古尼近年表现饱受批评，连曼联球迷都对佢冷嘲热讽，上场国际赛受到敌对球迷不断攻击，英格兰领队修夫基都忍唔住批评Haters嘅行为。哈利马古尼周三(13日)作出大反击，表明对外界攻击「未惊过」，而且好有信心今季会喺曼联孭重飞，坚持留队决定正确。

哈利马古尼喺上场对苏格兰嘅热身赛摆乌龙，而且被球迷不断柴台，呢位中坚日前反击：「球迷不断向我柴台施压，我唔会话自己习惯咗，但肯定可以应付得到。我唔系一个会被压力打败嘅人，球迷集中搵我嚟攻击，咁我嘅队友就可以冇咁大压力，自然可以表现得更好啦。」

对於夏天拒绝离开曼联，哈利马古尼就坚持决定冇错：「冇转会系因为倾唔掂，曼联话欢迎我留队，我亦想留低竞争。开季头1个月系特别困难，因为每星期得1场波，但依家开始赛程密集，我肯定我会踢好多比赛，亦会全力以赴。」曼联正选中坚华拉尼同利辛度马天尼斯都有伤在身，周六(16日)对白礼顿嘅联赛，哈利马古尼有望担正。