英超20路大军周三(13日)提交25人大军名单，近期备受注目嘅2大「麻烦友」安东尼马菲奥斯同查顿辛祖，齐齐喺曼联嘅名单上出现，意味「红魔鬼」未打算同佢哋斩缆。据英国《每日邮报》报道，坦哈格同查顿辛祖嘅和谈「未解决」，但球会2大高层已主动介入，向坦哈格施压要求同球员和解。

近日丑闻不断嘅曼联，公布嘅25人英超大军一切如常，因被3名女子指控袭击嘅安东尼，虽然被勒令延迟归队至另行通知，但坦哈格对佢非常支持，列入名单并唔意外，反而公开指责坦哈格「讲大话」嘅查顿辛祖，未被「封杀」而榜上有名，就令球迷喜出望外。

不过英国《每日邮报》爆料，坦哈格同查顿辛祖嘅「和谈」并未解决问题，双方会再安排另一次会面，曼联CEO李察阿诺特同总监梅托亦主动加入谈判，要求坦哈格搵方法同查顿辛祖修补关系，查顿辛祖日前将反击贴文喺社交网删除，正正就系梅托斡旋嘅成果，但报道指坦哈格同查顿辛祖嘅问题「难以解决」。

曼联今次提交嘅英超名单仲有惊喜，之前喺欧联名单落选嘅荷兰中场云迪碧克有份入围，至於2大新星海伦(前译贺兰特)同加拿祖并未上榜，因为佢哋都系21岁或以下球员，唔需要喺25人名单内注册，夏天其余新兵奥拿拿、美臣蒙特、苏夫恩岩拉伯特、比恩迪亚、庄尼伊云斯同利古朗悉数在列。