阿仙奴门将之争近期成为热话，大衞拉耶同兰斯达尔2大门将竞争激烈，西班牙国脚大衞拉耶近期占据上风，连续3场正选上阵，周日(24日)对热刺嘅北伦敦打吡，坐後备席嘅兰斯达尔曾为大衞拉耶「神救」鼓掌，但利物浦名宿加历查就耻笑佢系「戏子佬」，引嚟各界炮轰。

大衞拉耶喺对热刺一仗，曾飞身救出班伦庄臣嘅近门必入球，睇到坐冷板嘅兰斯达尔都高举双手鼓掌，不过为《天空体育》评述嘅加历查就话：「我好似睇紧奥斯卡颁奖礼，你知道拎唔到奖嘅人，都会笑晒口咁为得奖者拍手，其实个心就碎晒，睇见都觉得好好笑。」

加历查呢番言论就得罪唔少人，兰斯达尔爸爸亦喺社交网反击：「你真系可耻，唔该畀少少风度出嚟，我个仔就有啦！」阿仙奴领队阿迪达早前表示，会将门将同场区其余位置一视同仁，根据战术需要而轮换门将。