RB莱比锡将於周四(5日)凌晨欧联主场对曼城，呢支德甲劲旅有「球星加工厂」之称，今夏又签入唔少笋货，最受瞩目必定系有「夏兰特2.0」之称嘅射手施斯高。呢位20岁斯洛文尼亚国脚集技术、力量、速度於一身，曾获得利物浦垂青，如果佢喺今届欧联交出成绩，相信可以追随艾宁夏兰特步伐，登陆英超。

身高1米94嘅施斯高除咗身型似艾宁夏兰特之外，2人都效力过奥地利球队萨尔斯堡，然後转战德甲。虽然施斯高入波数字唔及正版夏兰特，但佢今季加盟RB莱比锡後不乏佳作，包括季初德甲对柏林联梅开二度，上轮欧联对年青人，亦射入1球，协助球队赢3比1，至今为RB莱比锡上阵8场入5球，效率非常高。

施斯高效力萨尔斯堡时期，利物浦已经睇中佢，但被RB莱比锡捷足先登。不过红军近年经常收购RB莱比锡球员，包括拿比基达、伊巴希马干拿迪、苏保斯拉尔，如果施斯高继续有好表现，话唔定下一站加盟红军。

值得一提，上年9月欧国联斯洛文尼亚对挪威，施斯高曾经同艾宁夏兰特交锋，虽然夏兰特先入波，但施斯高仲犀利，贡献1传1射，协助斯洛文尼亚反胜2比1，两人今仗欧联碰头，就睇下边位可以做赢家。