今晚凌晨欧联G组重头戏，RB莱比锡主场火并曼城。莱比锡啱啱喺联赛激战完未回气，而且每逢遇到英超兵经常脚仔软，睇番近年碰头曼城例必抢缰，何况佢哋有下仗硬撼阿仙奴嘅後顾，今仗必想速战速决，半场客胜有计。（Now 644周四凌晨3时直播）

查实莱比锡状态唔错，包括欧联首轮以3比1击败年青人，不过日前喺德甲面对班霸拜仁慕尼黑，领先两球仍畀对手逼和，赢唔到波唔抵之余，亦耗力不少，今仗未必回得切气。除此之外，莱比锡近年最惊英超兵，之前6次喺欧联面对英超球队，只得1胜1和4负，包括上届8强两斗今仗对手曼城未赢过之余，共失8粒，未踢先怯。

曼城虽然日前联赛倒灶输畀狼队，不败之身被破，但吸取教训後今仗唔敢轻敌，佢哋於欧联首轮反胜贝尔格莱德红星3比1打响头炮，就算奇云迪布尼、贝拿度施华因伤倦勤，前线嘅艾宁夏兰特、祖利安艾华利斯、菲尔科顿合作威力未减。尤其夏兰特今季已入8球，上届对莱比锡个人更独取5球，今仗再遇，肯定唔会放过疯狂入波嘅机会。

由於「蓝月亮」下仗联赛要作客阿仙奴，今仗必想尽快锁定胜局，等主力早啲休息，何况双方上届两次喺欧联交手，曼城上半场都领先，半场客胜值得捧场。