巴塞隆拿周四(5日)凌晨喺欧联H组，作客1比0击败葡超劲旅波图，2战全胜排小组榜首。巴塞神童耶马今场正选上阵，以16岁83日之龄成为欧联史上最年轻正选球员，不过佢喺下半场曾经「消失」9分钟去厕所「开大」，最终更冇再入场而尴尬被换走。

耶马喺分组赛首轮曾经後备上阵，今场担正令佢以3日之差，打破巴巴耶路(16岁86日)喺1994年於安德列治创下嘅欧联最年轻正选上阵纪录。两队今场势均力敌，巴塞早段有罗拔利云度夫斯基伤出，由费伦托利斯入替，呢位後备前锋亦不负所托，喺上半场补时入波为巴塞领先。

71分钟耶马突然离场去厕所，而且迟迟未返入球场，结果喺80分钟由马高斯阿朗素入替，巴塞足足有9分钟要10人应战，就算加维喺补时2黄1红被逐，巴塞最终都坚守1比0胜果。据报耶马今场系带病上阵，疑似「肚痾」难止而无法继续比赛。