西班牙年轻教头沙比阿朗素今季人气急升，佢带领嘅利华古逊喺德甲雄霸榜首，成绩好之余仲踢出华丽足球，自然成为球坛抢手货。据德国《体育图片报》报道，原来沙比阿朗素合约内有「回巢条款」，令欧洲3大豪门虎视眈眈。

41岁嘅沙比阿朗素，首度担大旗领军就令利华古逊脱胎换骨，早前有传皇家马德里想佢接替安察洛堤嘅位置，沙比阿朗素球员时代曾效力皇马5季，由佢接掌皇马亦系顺理成章。有趣嘅系，沙比阿朗素另外2间前球会拜仁慕尼黑同利物浦，都传出密切注视佢嘅发展。

《体育图片报》消息指，沙比阿朗素同利华古逊合约去到2026年，但当中就有「回巢条款」，列明如果皇家马德里、拜仁慕尼黑同利物浦提出斟介，佢系有权选择转会。不过，沙比阿朗素今年8月曾表示，佢同利华古逊有共同理念，而且球会只系啱啱起步，相信就选转会亦唔会系今季之内嘅事。