韦斯咸周五(6日)凌晨喺欧霸盃A组，作客2比1击败德甲嘅弗赖堡，成功改写英格兰球队嘅欧战历史！韦斯咸已经连续17场欧洲赛保持不败，超越1968年嘅列斯联、1972年嘅热刺同埋依家嘅曼城，创下英格兰球队欧战最长不败纪录。

上届欧协联盟主韦斯咸，今届「升呢」踢欧霸一样得心应手，今仗作客弗赖堡开波8分钟就由卢卡斯柏基达先拔头筹，虽然弗赖堡换边後由路兰沙拉尔追平，但阿古特66分钟接应角球顶入，就帮韦斯咸赢2比1，喺A组两战全胜排榜首。

韦斯咸上届喺欧协联以14胜1和不败成绩捧盃，今届欧霸盃2场分组赛亦赢晒，欧战17场不败(16胜1和)走势创下英格兰球队纪录，踢紧欧联嘅曼城目前不败走势系16场，两队今届欧洲赛事将「隔空」斗法。韦斯咸领队莫耶斯赛後表示：「创不败纪录当然开心，但更重要嘅系赢波，呢3分对我哋争出线非常重要。」