皇家马德里喺周一(6日)凌晨西甲损兵折将，佢哋主场狂攻华历简奴，全场22次攻门颗粒无收下踢成0比0平手。皇马痛失2分，意味西甲经过12轮联赛後，由前季仲踢紧西乙嘅基罗纳以31分排喺榜首，真系估你唔到！

皇马上场国家打吡绝杀巴塞隆拿，今仗只要赢波就做番1哥，但面对死守嘅华历简奴完全冇晒符，祖迪比宁咸比赛中更膊头受伤，要去场边食止痛药顶足全场，最终皇马22次攻门都「食白果」，以0比0完场。今仗系皇马自安察洛堤上任以嚟，第2次单场攻门22次或以上但入唔到波嘅赛事。

依家榜首系基罗纳，佢哋周日(5日)赢奥沙辛拿录得联赛4连胜，今季12轮有10胜1和1负成绩。皇马教练安察洛堤赛後最关心祖迪比宁咸伤势：「比宁咸膊头有啲问题，我哋听日会同佢做检查，希望佢可以喺欧联(周四)对布拉加上阵。」