周日(5日)凌晨西甲赛事，巴塞隆拿作客1比0「绝杀」皇家苏斯达，教练沙维赛後承认球队踢得唔好，但今场胜仗可以「弥补」上轮国家打吡输波之痛。下半场沙维曾经派人拎神秘纸条畀恩尼高马天尼斯，被球迷指系「胜利锦囊」。

巴塞隆拿今场表现麻麻，皇家苏斯达嘅进攻更有效率同入肉，双方一直拉锯，下半场中段巴塞隆拿作出多个调动，沙维亦搵人将纸条交到恩尼高马天尼斯手上，变阵後巴塞有起色，终於喺补时2分钟由朗奴阿拿奥祖接应根度简妙传，插水式顶入赢1比0。

沙维赛後表示：「我哋上场对皇马踢得好好，应该赢波但输咗，今场我哋唔值得赢波，但就拎到宝贵3分，亦令我对上场输波冇咁嬲，不过我哋都要自我反省点解今场踢得咁差。」对於畀恩尼高马天尼斯嘅字条，沙维就解释：「我哋换咗好多人，可能会造成混乱，我畀咗战术指示佢。」