曼城周六(4日)英超再显王者本色！凭住比利时翼锋谢利美杜古交出1入波+4助攻，曼城主场以6比1狂数般尼茅夫，领队哥迪奥拿大赞佢系球坛罕有嘅「扭波王」。

曼城今场围攻般尼茅夫，谢利美杜古30分钟先开纪录，佢之後不断用扭波同走位制造攻势，完半场前两度助攻贝拿度施华同文路尔艾简治入波。弗爆嘅谢利美杜古收唔到油，64分钟再妙传菲尔科顿射入，般尼茅夫74分钟破蛋，但谢利美杜古83分钟後场交出长直线畀贝拿度施华单刀射入，食出助攻「大四喜」，加上尼敦阿基完场前2分钟埋斋，协助曼城狂数6比1。

哥迪奥拿赛後表示：「唔止今场，杜古今季每场波都有出色表现，令所有人都惊讶。明显杜古喺禁区附近威力好大，今时今日好难搵到一个球员，可以好似佢咁喺狭窄范围内扭波，而且佢喺头5米嘅爆发力系世界最快之一，就算佢冇机会扭波，佢做嘅决定都系正确，呢个系佢成为伟大球员嘅原因。」