英超前列大战，纽卡素主场恶斗阿仙奴。「喜鹊」周中英联盃大炒曼联，信心爆棚要破「兵工厂」今季英超不败身，两支有份出战欧联嘅劲旅，近期赛事火力全开，想睇入球骚今场唔会失望，3.5球嘅入球大值得一试！（Now 621及611周日凌晨1时30分直播）

纽卡素近期激战连场，今仗系佢哋10日内第4场赛事，球员体力难免受到影响，向来稳阵嘅防守亦出现裂痕，上星期联赛就喺两度领先下，被狼队逼和2比2。周中英联盃赢曼联一仗，又多添左闸马特泰基特一员伤兵，要顶住阿仙奴进攻唔容易。

「喜鹊」胜在进攻锐利，前线个个都处於佳态，阿历山大伊沙克受伤後，顶上嘅哥林威尔逊近2场联赛入3球，纽卡素近5场联赛狂轰18球，当中4场总入球开4球或以上。加上周中作客大炒曼联，全队士气极高，喺圣占士公园球场浩大声势下，肯定会全力抢攻。

阿仙奴周中英联盃1比3输畀韦斯咸，不过加比尔马天尼利、布卡约沙卡、马田奥迪加特等攻击主力全部後备上阵，明显系留力今仗搏杀，佢哋上场联赛5比0大破锡菲联，一众攻击球员状态大勇，3.5球大盘相当好路。