哈利卡尼加盟拜仁慕尼黑近3个月，但仍然未搵到稳定居所，一直住紧豪华酒店，根据英国《太阳报》爆料，哈利卡尼及随行人员呢段时间嘅酒店费用支出已经高达100万镑(约996万港元)，够钱喺香港买楼。

据悉哈利卡尼抵达慕尼黑之後，同家人入住当地一间豪华酒店套房，有独立客厅及两间睡房，每晚费用1万镑。呢位30岁英格兰国脚税前周薪达到41.8万镑，要应付呢笔酒店支出，仍然绰绰有余，但问题系酒店私隐及保安都唔及私人豪宅，所以哈利卡尼近期积极四出搵租盘，佢早前去到一个豪宅区，参观一间大屋，入面有游池、水疗中心等设施，每月租金8万欧元(约67万港元)，远低於住酒店，但都系唔符合佢心水。

哈利卡尼上仗德甲对多蒙特，射入3球，今季已经3次上演「帽子戏法」，拜仁慕尼黑中场汤马士梅拿讲笑话：「哈利每次入3球，都会拎走个波，睇怕佢好快要租多1间酒店房收藏皮球。」