沙特阿拉伯豪门伊蒂哈德今季成绩欠佳，会方向主帅开刀，宣布解雇教练纽奴，据悉呢位葡萄牙名帅真正「死因」系同队内球星宾施马闹不和，伊蒂哈德选择支持前金球奖得主宾施马，所以趁机换帅，希望令球队重生。

伊蒂哈德今夏签入2位法国球星宾施马、尼高路简迪，但现时仅排联赛第6位，落後榜首希拉尔11分，上仗亚冠盃不敌伊拉克球队空军体育会，近4场比赛只有1胜，会方决定炒纽奴，结束双方近1年半宾主关系。

盛传射手宾施马曾於球队开会期间，公然批评纽奴嘅战术部署，令呢位前热刺领队感到权威被挑战，2人因而吵大镬，甚至互相辱骂，关系已彻底破裂，到咗无法挽回地步。伊蒂哈德管理层考虑到球队成绩未如理想，加上宾施马属於「金漆招牌」，最终决定牺牲纽奴。

据悉伊蒂哈德最希望聘请施丹执教，因为佢同宾施马曾於皇马合作愉快，赢尽西甲及欧联冠军，如果请唔到施丹，都希望搵法国籍教练，起码同宾施马同声同气。