周六(11日)德甲赛事，拜仁慕尼黑主场4比2大破海登咸，英格兰前锋哈利卡尼又入2球，11轮联赛入17球打破德甲历史纪录，而且已经超越上季德甲金靴奖嘅总入球数，认真夸张！

拜仁今场踢得轻松，大勇嘅哈利卡尼上半场2度接应利莱辛尼助攻入波，半场领先2比0。拜仁下半场放慢脚步，意外连失2球被追和，不过佢哋企稳阵脚後，再由拉菲尔古里路同祖普莫亭入波赢4比2。

哈利卡尼今夏登陆德甲，11场联赛狂入17球，已经超越咗上季德甲金靴尼干古同富克洛嘅16球，亦创下德甲史上11轮最高入球纪录，打破罗拔利云度夫斯基喺19/20球季11轮入16球成绩。

哈利卡尼被指可以打破罗拔利云度夫斯基单季41球纪录，呢位英格兰前锋赛後表示：「好问题，我可能全季都会被追问呢条问题，但球季仲有好长嘅路要走......」