周日(26日)凌晨德甲，利华古逊作客3比0大炒云达不来梅，联赛8连胜後再次压倒拜仁慕尼黑登上榜首。利华古逊创下德甲最佳开季纪录，华丽嘅进攻足球「好睇又好食」，难怪教练沙比阿朗素被传系皇家马德里下任教头大热！

利华古逊开季势如破竹，今场9分钟就靠对手摆乌龙领先，谢利美费林邦同阿历斯基莫度亦各入1球，顺利3比0大胜云达不来梅。利华古逊开季12战有11胜1和接近完美战绩，追平拜仁慕尼黑15/16球季最佳开季纪录(头12轮)，同时亦系德甲史上首支喺头12轮都攻入2球或以上球队，火力惊人。

今季加盟利华古逊表现大勇嘅格列沙加，赛後呼吁队友保持警觉：「结局仲未落实，我哋要继续保持依家嘅精神，足球场上乜都有可能发生，我哋要脚踏实地，睇下最後拎到咩成绩。」