近期盛传曼联中坚华拉尼不满做後备，有意明年1月冬季转会市场重开後离队，德甲豪门拜仁慕尼黑都想加入争夺呢位30岁法国名将。根据英国《镜报》爆料，曼联主帅坦哈格已经同意华拉尼离队要求，但必须等今季结束之後，先至可以走人。

华拉尼曾於季初受伤，但复出後被坦哈格投闲置散，呢位荷兰名帅宁愿用35岁老将庄尼伊云斯担任正选中坚，都唔用华拉尼，令佢意兴阑珊，多次传出华拉尼可能明年1月离队，沙特阿拉伯豪门艾纳斯、拜仁慕尼黑都有意签佢。

最新消息指坦哈格愿意放走华拉尼，但要等到明夏先至可以转会，以免削弱球队今季防线人脚，特别系2位中坚庄尼伊云斯、利辛度马天尼斯都有伤在身，坦哈格更加唔想季中畀华拉尼离队。

据悉曼联一旦出售华拉尼，希望收回2,000万镑(约1.95亿港元)转会费，叫价并唔高，但系佢年薪高达1,770万镑(约1.73亿港元)，并唔系好多球会愿意支付呢份巨额人工，财大气粗嘅沙特球会最大机会成为华拉尼嘅归宿。