美斯纪录性8次获得金球奖，相信亦系最後1次，因为呢位36岁阿根廷国脚已经转战美职，加上宿敌C朗早一步去咗沙特阿拉伯搵食，随住两大球王先後淡出顶级赛事，「美C争霸」正式落幕。球坛进入群雄并起新时代，8位当打球星来势汹汹，对於「世一」名衔虎视眈眈，各施所长展开一场明争暗斗，大家拭目以待，睇下边位可以率先跑出，成为下届金球奖得主。

●球王认证！夏兰特坐正在望？

艾宁夏兰特上季加盟曼城，上阵53场入52球，协助「蓝月亮」创造历史，首次成为英超、英足盃、欧联「三冠王」，自己亦获得英超及欧联神射手，入球能力不亚於全盛时期嘅美斯同C朗，无奈遇上美斯率领阿根廷捧世界盃冠军，完成「千古一帝」伟业，只能乖乖做住「阿二」先。其实论上季整体表现，夏兰特无疑系「世一」，美斯都认为呢位挪威国脚值得攞金球奖。

喺曼城大把机会刷数据

艾宁夏兰特只系23岁，仍然有进步空间，除咗本身能力出众之外，加上佢效力当今最佳球队曼城，有大把机会入波「刷数据」及夺取更多冠军奖盃，无疑可以增添夺取金球奖嘅本钱。艾宁夏兰特最大「弱点」系挪威国家队积弱多年，相比两大争「世一」劲敌法国射手基利安麦巴比、英格兰中场祖迪比宁咸，夏兰特国际赛成绩表难免比较输蚀。

●麦巴比转战英西先有价讲

被誉为美斯、C朗拿度後最具统治力嘅前锋，麦巴比嘅「屈机」球技同超强入球数字，已经证明佢系当今最接近「球王级」嘅球员。年纪轻轻已经踢过2次世盃决赛、喺世盃决赛连中三元、拎过世盃冠军，麦巴比缔造历史嘅能力唔使怀疑，而且法国国家队基本上系所有国际大赛嘅夺标热门，进一步增加麦巴比「叫胡」筹码。

PSG喺欧联难有突破

事实上，麦巴比依家所欠缺嘅，系需要喺球会层面上作出突破，佢效力巴黎圣日耳门就算喺法甲点样称霸，含金量始终唔及英超、西甲等最强联赛，而巴黎圣日耳门喺欧联亦冲唔过樽颈，令佢唔可以更上层楼。当然，一直热传麦巴比将加盟皇家马德里，或者转去英超、西甲，会系麦巴比登上王座嘅关键一步。

●西甲旺攞奖比宁咸争埋一份

过去14届金球奖得主，有12届系由西甲球员拎到，除「绝代双骄」美斯同C朗拿度外，莫迪历、宾施马都系以皇家马德里球员身份得奖，加上2000年後嘅费高、朗拿度、朗拿甸奴、简拿华路等等，西甲正正就系金球奖嘅最大产地。

皇马新Icon光芒四射

至於目前西甲最炙手可热嘅球员，正正系皇马「新皇帝」祖迪比宁咸，以佢今季咁出色嘅表现，如果可以保持到落去，未来金球奖又点少得佢！

●哈利卡尼登顶关键还看欧国盃

哈利卡尼今夏终於离开效力咗14年嘅热刺，呢个决定不单止有机会令佢哋「无冠生涯」出现零的突破，更有可能令佢成为自2001年奥云之後，第2位英格兰球员加冕成为金球奖得主。

德甲爆发冲双冠

哈利卡尼喺热刺早已证明其实力，系热刺及英格兰史上入球王，近年更有时稍稍堕後做埋助攻嘅角色，技术更加全面。今夏去到德甲班霸拜仁慕尼黑，立即显示其过人嘅入球能力，截至上周，佢为拜仁喺联赛射入17球，成为德甲史上首11场入波最多球员，各项赛事上阵16场入21球，入球效率惊人。

虽然拜仁失落德超盃及德盃，但只要哈利卡尼能够协助球队赢得联赛及欧联成「双冠王」，再於明年欧国盃助英格兰夺冠或最低限度杀入决赛，情况就会似2018年嘅莫迪历一样，成功於金球奖登顶。

●「小云」要借欧联效应帮手

云尼斯奥斯祖利亚连续2年金球奖都杀入前10，由第8位升上今年嘅第6位，近2季入球均达20+，虽然依家喺皇马风头唔及祖迪比宁咸，但喺老将宾施马今夏离队後，「小云」已经升呢「银河舰队」锋线1哥，肩负更多入波重任，更加抢fo。而且近年有个传统，只要皇马勇夺欧联冠军，金球奖都会成为呢支班霸嘅球员囊中物，从2014年开始5次称霸欧洲，金球奖尽归「银河舰队」球员，「小云」前届欧联决赛曾一箭定江山，唔系冇机。

●国际赛成奥迪加特最大障碍

当年以神童之名加盟皇马嘅马田奥迪加特，反而离开「银河舰队」获得重生。呢位阿仙奴同挪威国家队双料队长，系两队当仁不让嘅核心人物，尤其系上季率领低迷多年嘅阿仙奴长居英超榜首，虽然最终功败垂成，但佢出色嘅领导才能，组织进攻及埋门持续升呢，备受肯定，难怪两度获得英超每月最佳球员、入选英超年度最佳阵容等，并喺今届金球奖头30位榜上有名，不过挪威绝迹各项国际大赛，难免被扣分。

●艾华利斯仍需努力接替美斯

如果要喺阿根廷拣一个美斯接班人，祖利安艾华利斯绝对有资格，呢位身高5尺7寸前锋射术精湛，盘扭了得，去年首次进军卡塔尔世盃就射入4球，其中4强对克罗地亚梅开二度，成为自1958年巴西球王比利以来，最年轻世盃4强起孖球员，并最终赢得世盃冠军。

祖利安艾华利斯上季亦系曼城赢得联赛、欧联、英足盃「三冠王」成员之一，不过全季锋头尽归队友艾宁夏兰特，暂时佢只系陪衬，想喺球会赛事独当一面，上升到美斯嘅高度，仲要付出更大努力，博取哥迪奥拿信任先得。

●孙仔热刺揸旗盼实现梦想

南韩队长孙兴民早已在热刺证明自己，4度当选英超每月最佳、2021至22年球季英超金靴、英超累积攻入过百球、欧洲顶级赛事攻入超过200球，已经系公认嘅「亚洲天王」。

不过以「孙仔」成就，距离金球奖仍然遥不可及，除非佢能够达成多项条件：1.协助多年无冠嘅热刺赢得英超冠军，2.个人再夺英超金靴甚至欧洲金靴、3.南韩国家队在2026世盃取得令人信服演出。就近期所见，普斯迪高路领军嘅热刺，或有机会帮佢实现梦想。