明年欧国盃决赛周主办国德国颓势未止，喺周三(22日)凌晨热身赛以0比2不敌奥地利，遭遇2连败，翼锋利莱辛尼愈踢愈躁，向对手动粗，被球证直接出示红牌赶出场，亦系呢位拜仁慕尼黑球星职业生涯首次被逐，可见「日耳曼兵团」军心不稳，领队拿高斯文有排执。

德国上场热身赛2比3输畀土耳其，今场面对「日耳曼细佬」奥地利，上半场29分钟，被沙比萨射入大门。换边之後，奥地利再由巴姆加特拿建功，赠德国两蛋。

德国唔止输波，仲输人，利莱辛尼踢到49分钟，同手美维尼发生争吵後，愤而出手推跌呢位奥地利後衞，结果换来1张红牌，佢离场时仲怒气冲冲，需要奥地利前锋阿拿奥杜域上前「开解」。

德国近年成绩每况愈下，今年9月热身赛以1比4大败於日本国脚下後，领队费历克被炒，其後请来前拜仁主帅拿高斯文领军，但除咗首仗赢美国之外，近3场只有1和2负，又打回原形。欧国盃将於明年6月开波，如果德国表现继续低迷，恐怕即使有主场之利亦无补於事。

最讽刺系奥地利有「德国B队」之称，领队系德国名帅兰历克，今场2位入波球员沙比萨、巴姆加特拿，甚令利莱辛尼被逐嘅美维尼都喺德甲搵食，难怪网民抽水话现时「日耳曼大哥」应该系奥地利。